Zindagi har waqt ek jaisi nahi rehti. Kabhi raaste dhundhle ho jaate hain, kabhi manzil door nazar aati hai, aur kabhi lagta hai ki sab kuch ruk sa gaya hai. Lekin dil ke kisi kone mein ek chhoti si umeed hamesha zinda rehti hai. Wahi umeed hume gir kar uthna sikhati hai, andheron mein roshni dikhati hai aur yakeen dilati hai ki kal aaj se behtar ho sakta hai. Ye panne unhi umeedon ke naam hain jo mushkil waqt mein bhi saath nahi chhodti.
Aitabar Hai
Na jane kitni uchaiyon ko chuwe hai,
Na jane kitni geharaiyon mein rahe hai,
Na jane kitne mausam dekhe hai,
Na jane kitni raaton ko na soye hai,
Na jane kab hoga sabera,
Na jane kab mitega andhera,
Na jane kyon chale ja rahe hai,
Na jane kiski talash mein hai,
Milegi manzil mujhe,
Bus is baat par aitabar hai.
Thehara Lamha Bhi Gujar Jayega
Thehara lamha bhi gujar jayega,
Ye waqt bhi badal jayega,
Ek kadam badha ke to dekh,
Rasta bhi mil jayega,
Aur manzil bhi dikh jayega.
Naya Suraj Bekherega Nayi Kirane
Jab asmaan pe andhera chhane lage,
Jab gamo ke badal mandrane lage,
Khayalon ke takrane se bijli kadakne lage,
Behisab ankhon se aansu behne lage,
Tum rehna shant,
Intezaar mein rehna us toofan ke,
Phir poori zor laga dena,
Bhid jana jab ho wo apne ufaan pe,
Tumhari himmat ke aage,
Wo apna sir jhukayega,
Ye toofan bhi tham jayega,
Badal bhi chhat jayega,
Aasmaan pe phir naya suraj aayega,
Jo khushiyon se apni kirane bikherega.
Chalta Chala Ja
Thes lagne se shisha chur chur ho jata hai,
Patharon ko tarasho to nikhar jata hai,
Bus apni manzil ki aur chalta chala ja,
Na dekh apne zakhmon ko,
Chot kha ke hi to,
Loha faulad ban jata hai.
Ek Alag Sham
Aaj ek alag sham hai,
Tanhaiyon ka na naam-o-nishan,
Jinse ladta raha zindagi bhar,
Jab unko maine saathi bana liya,
Phir se muskurana aa gaya,
Mujhe phirse jeena aa gaya.
Milke Sudhar Jayenge Haalat
Kaise batao haalat mere,
Bimari ki jad hai jazbaat mere,
Dava se na dua theek hoga,
Tum mil jao to sudhar jayenge haalat mere.
Udaan
Kaise rakhoge bandh pinjre mein,
Jiski gagan se bhi oonchi udaan,
Jise baadal na rok paaye,
Jo hawaon par chhode nishaan,
Jise dekh zameen kare salaam,
Aur chhoo le neela aasmaan.
Jiske paron mein junoon bhara ho,
Aur woh jaaye seema laangh,
Kaise rakhoge bandh pinjre mein,
Jiski aisi oonchi udaan.
Umeed hamesha kisi badi jeet ka naam nahi hoti. Kabhi kabhi wo sirf itna sa yakeen hota hai ki kal ka din aaj se behtar hoga. Raaste kitne bhi mushkil kyon na ho, waqt kitna bhi sakht kyon na ho, ek chhoti si umeed insaan ko aage badhne ki wajah de deti hai. Shayad isi liye andheri raaton ke baad bhi log subah ka intezaar karte hain.
