Har safar sirf manzil tak pahunchne ka naam nahi hota. Kuch safar hume naye shehar dikhate hain, aur kuch hume khud se milvate hain. Raaste badalte hain, log badalte hain, aur waqt ke saath hum bhi badal jaate hain. Kabhi hawa ke jhonke ki tarah bhatakna padta hai, kabhi toofano se takrana padta hai, aur kabhi khamosh baith kar apne hi dil ki awaaz sunni padti hai. Ye panne usi safar ki dastaan hain.
Kirdar Badalte Rahte Hai
Suraj wahi Chand wahi,
Din raat badalte rahte hai,
Duniya wahi kudrat wahi,
Mausam badalte rahte hai,
Jeena wahi marna wahi,
Log badalte rahte hai,
Rangmanch wahi kahani wahi,
Bus kirdar badalte rahte hai.
Aazad Parinda
Na jane kitne mausam dekhe hai,
Na jane kitne saath aaye aur chale gaye hai,
Na jane kyon tujh par aake ruka hoon,
Na jane kyon tere sajjade mein jhuka hoon,
Na daal pyar ke dane tu,
Na bandh mujhe zanjiron mein,
Mujhko pyari hai meri aazadi,
Kyon ki main aazad parinda hoon.
Khubbiyo Se Roshan Jag Sara
Aasman nahi,
To badal ban ke barso,
Agar badal nahi,
To vishal vrikch ban ke aasara do,
Vishal vrikch nahi,
To pedh ban kar phalo,
Agar pedh nahi,
To paudha ban kar phoolo,
Paudha nahi,
To ghas ban kar sukoon do,
Chahe suraj bano chand bano ya tara,
Apne kad se nahi,
Apni khubiyon se,
Roshan kar do jag sara.
Toofan
Toofan utha hai sine mein,
Us toofan se main takarunga,
Ek din dekha dunga uth ke,
Aasman ko dharti pe jhukaunga,
Aaj hoon goomnami ke andhere mein,
Ek din suraj se ankh milaunga,
Aaj kya hoon main na khud ko pata,
Ek din aisa kuch kar jaunga,
Log karenge meri baatein,
Main wo misaal ban jaunga.
Maiy / Main
Main ki khatir,
Maiy mein khoya raha,
Khwab to dekhe badde,
Par khuli ankhon se soya raha,
Ab hosh mein aaya hoon to jaga hoon,
Akhir mein na Maiy raha,
Na main raha.
Khamoshi
Khamoshi mein bhi kuch baat hai,
Ye wo shoor hai jiski na koi awaz hai,
Khamoshi se dil pukkare jisse,
Samajh lo wahi to tumhara pyar hai.
Safar ka asli maza manzil par pahunchne mein nahi, balki us insaan ko pehchanne mein hai jo safar ke dauran hum ban jaate hain. Kuch log raaston mein milte hain, kuch yaadein saath chalti hain, aur kuch sabak umr bhar ke humsafar ban jaate hain. Jab peeche mud kar dekhte hain, tab samajh aata hai ki safar sirf raaston ka nahi tha, khud ko samajhne ka bhi tha.
